Midagsa sa Kapitolyo ang mga public utility jeepney (PUJ) drivers ug passenger assistant officers (PAOs) gikan sa lain-laing bahin sa probinsya sugod kagahapon Abril 9 aron modawat sa 10-kilo nga bugas nga ayuda gikan sa Cebu Provincial Government, tungod sa pagsaka sa presyo sa krudo.
Usa sa mga nakabenepisyo mao si Ramil Miñoza, residente sa Pinamungajan, nga 12 ka tuig nang drayber sa jeep sa Cebu City. Matud niya, dako kaayo ang ilang pasalamat sa bisan unsang tabang gikan sa gobyerno tungod kay lisod na kaayo ang kahimtang karon.
Dugang pa niya, human siya makabayad sa boundary, mga ₱700 na lang ang iyang madala pauli matag adlaw, nga layo ra kaayo sa iyang kinitaan kaniadto nga moabot og ₱1,500 hangtod ₱2,000.
Sumala pa ni Miñoza, alang sa iyang pamilya nga unom ka miyembro, ang 10-kilo nga bugas makatabang og molungtad og mga duha ka semana.
Samtang, usa usab ka drayber nga si Roberto Martinez, 80 anyos gikan sa Dumanjug, nakadawat usab sa maong ayuda. Tungod sa kainit sa panahon, gibati siya og kalipong ug gitabangan og wheelchair. Sa interbyu, halos mihilak siya samtang nagsaysay nga tungod sa pagsaka sa presyo sa krudo, naluya na ang iyang kita ug napugos siya pag-undang sa pagdrayb niadtong Marso 24 human makadala lamang og ₱225.
Miduaw usab sa distribusyon si Gob. Pamela Baricuatro, uban sa pipila ka mga miyembro sa Provincial Board, ug miingon nga naningkamot ang iyang administrasyon sa paghatag og tabang sa mga sektor nga naapektuhan pinaagi sa lain-laing programa.
Padayon ang distribusyon sa bugas sa Kapitolyo hangtod sa sunod adlaw ug gipaabot nga tibuok adlaw kini nga kalihokan.
Ang maong programa gipahigayon sa Kapitolyo uban sa koordinasyon sa Land Transportation Franchising and Regulatory Board (LTFRB) 7, nga maoy naghatag sa listahan sa mga kwalipikadong benepisyaryo base sa gisumiter nga ngalan sa mga rehistradong transport operators sa probinsya. Gihatag ang ayuda pinaagi sa batch, ug gitambagan ang mga drayber nga makig-coordinate sa ilang operators alang sa schedule ug claiming number.
Source: Cebu Province PIO
I via Renante Socia Lada