Naghimo og libreng reproductive health mission ang Cebu Provincial Government sa Danao City aron mapaduol ang serbisyo sa panglawas sa katawhan, ilabi na sa family planning.
Sumala sa Kapitolyo, mokabat sa 31 ka residente ang nakabenepisyo sa maong programa, diin 26 kanila ang gipa-ilalom sa bilateral tubal ligation samtang lima ang nagpa non-scalpel vasectomy.
Gipatuman ang maong medical mission uban sa tabang sa Department of Health – Central Visayas Center for Health Development, Commission on Population and Development, DKT Philippine Foundation Inc., ug Integrated Midwives Association of the Philippines. Nisalmot usab ang Cebu Provincial Hospital sa paghatag og suporta sa kalihokan.
Matud ni Dr. Nikki Catalan, consultant sa Piso Health program sa Kapitolyo, dili lang numero ang nagpasabot sa maong programa kondili mga pamilya nga gihatagan og kahigayunan sa pagplano sa ilang kaugmaon.
Dugang pa niya, ang pag-access sa reproductive health dili lamang serbisyo kundili usa ka katungod, ug importante sa pagtukod og mas himsog ug lig-on nga komunidad.
Gipasabot usab nga ang paglakip sa vasectomy sa programa usa ka lakang aron madugangan ang partisipasyon sa kalalakin-an sa family planning, nga kasagaran kulang sa maong mga programa.
Nagpasalamat ang Kapitolyo sa tanang kauban nga ahensya ug healthcare workers nga mitabang aron mahimong malampuson ang maong misyon.
Source: Cebu Province PIO
I via Renante Socia Lada