Na-rescue sa City Drug Enforcement Unit sa Cebu City Police Office ubos sa pagpanguna ni PCPT Gabriel P. Mota ang usa ka menor de edad nga batang babae sa usa ka anti-illegal drug operation niadtong Pebrero 17, 2026 sa Sitio Sto. Niño 1, Barangay Luz, Cebu City.
Nasakmit sa operasyon ang nagkadaiyang pakete sa gidudahang shabu nga nagkantidad og ₱88,400 ug gibug-aton og 13 gramos, kauban ang drug bust money ug coin purse nga gituohan nga container sa drogas.
Ang menor kasamtangan nga gipailalum sa kustodiya sa Cebu City Police Office alang sa dugang legal nga proseso. Siya nag-atubang sa kaso sa pagpamaligya ug paghupot sa ginadiling ilegal nga drogas ubos sa RA 9165 o Comprehensive Dangerous Drugs Act of 2002.
Matod ni George V. Ylanan, Officer-in-Charge sa CCPO, padayon nga hugot ang kapulisan sa kampanya batok sa ilegal nga drogas ug kriminalidad aron masiguro ang kahapsay ug kalinaw sa dakbayan.
Gihangyo usab sa kapulisan ang publiko nga magmatngon ug ipahibalo dayon ang tanang kadudahang aktibidad aron mapadayon ang kaluwasan sa komunidad.
Source: CCPO
I via Renante Socia Lada
#rpndykccebu