Nadakpan ang usa ka giingong drug lord ug iyang kauban sa buy-bust operation nga gihimo niadtong Pebrero 17, 2026 sa Barangay Libaong, Panglao, Bohol. Kapin usa ka kilo nga shabu nga nagkantidad og ₱8,815,520.00 ang nakuha sa operasyon.
Ang operasyon gihimo sa hiniusang pwersa sa Provincial Intelligence Unit ug Provincial Drug Enforcement Unit sa Police Regional Office 7, kauban ang Philippine Drug Enforcement Agency Region 7, Naval Forces Central, ug Panglao Municipal Police Station sa Bohol Police Provincial Office.
Narekober sa mga operatiba ang daghang sachet sa gituohang shabu nga may total nga gibug-aton nga 1,296.4 gramos, drug paraphernalia, ug usa ka loaded nga 9mm nga pusil nga adunay mga bala.
Sumala sa PRO7, ang nag-unang suspetsado usa ka high value individual ug giingong nagdumala sa dako nga pag-apod-apod sa ilegal nga drogas sa Bohol ug kasikbit nga mga lugar. Ang iyang kauban giingong mitabang sa paglihok ug pagbaligya sa ilegal nga drogas.
Ang mga nakompiskar nga shabu gidala na sa Bohol Provincial Forensic Unit alang sa eksaminasyon sa laboratoryo. Ang duha ka suspetsado anaa karon sa kustodiya sa Panglao MPS samtang giandam ang mga kaso batok kanila tungod sa paglapas sa RA 9165 o Comprehensive Dangerous Drugs Act of 2002 ug RA 10591 o Comprehensive Firearms and Ammunition Regulation Act.
Gidayeg ni PRO7 Regional Director Redrico A. Maranan ang mga operatiba sa ilang kalampusan ug mipasalig nga magpadayon ang kampanya batok sa ilegal nga drogas aron maprotektahan ang komunidad sa Central Visayas.
Source: PRO7 PIO
I via Renante Socia Lada
#rpndykccebu