Labing menos 362 ka residente ang nakabenepisyo sa libreng serbisyong medikal ug dental atol sa Medical ug Dental Mission sa Kapitolyo nga gihimo niadtong Enero 31 sa Barangay Abucayan, Balamban.
Sa usa ka adlaw nga kalihokan, gihatagan ang mga residente og konsultasyon, preventive care, ug libreng bitamina ug tambal. Sumala sa report, 112 ka tawo ang nagpamedikal nga konsultasyon, 118 ang napatangtangan og ngipon, ug 132 ang naka-avail og dental cleaning.
Gipasalamatan ni Capitol Health Consultant Dr. Nikki Catalan ang suporta ni Balamban Mayor Edwin Amos Cabahug, SK Chairman John Dominick Villarozo sa Barangay Abucayan, ug Benjo Labuca alang sa ilang tabang sa kalihokan.
Gipasalamatan usab niya ang Lamac Foundation sa paghatag og lugaw, ang Cebu People’s Action Center sa mainit nga pagkaon, ug si Dr. Olivia Dandan nga nanguna sa dental team ug sa koordinasyon sa lugar.
Matud ni Dr. Catalan, dako ang pasalamat sa padayong panagtinabangay nga nagtugot nga madala ang serbisyong panglawas ngadto sa mga lugar nga mas nanginahanglan.
Ang medical mission kabahin sa stopgap programs ni Gobernador Pamela Baricuatro aron matabangan ang mga labing nagkinahanglang residente samtang nagpadayon pa ang dugayng reporma sa 16 ka ospital nga gipadagan sa Kapitolyo.
Source: Cebu Province PIO
I via Renante Socia Lada