Aron masulbad ang grabeng kadaot sa mga eskwelahan nga hinungdan sa linog nga magnitude 6.9 nga miigo sa Northern Cebu niadtong Setyembre sa miaging tuig, magpatukod ang Cebu Provincial Government og bag-ong mga classroom building ug Temporary Learning Shelters (TLS) sa tibuok lalawigan.
Matud ni Gobernador Pamela Baricuatro, chairperson sa Provincial School Board (PSB), ang mga classroom lig-on ug moderno, ug gitukod aron makasugakod sa kalamidad sama sa linog, sunog, ug baha. Ang maong programa gihisgutan atol sa PDRRMC meeting niadtong Enero 30 sa Kapitolyo.
Sa plano, magtukod ang Kapitolyo og duha ka andana nga classroom building sa tanang 51 ka local government units sa Cebu, lakip ang 44 ka lungsod, unom ka component cities, ug ang Dakbayan sa Mandaue. Ang matag building adunay upat ka classrooms nga makakupot og hangtod 40 ka estudyante matag usa.
Ang mga classroom kumpleto sa lingkuranan, electric fans, smart TV panels, whiteboard, ug WiFi-ready nga pasilidad. Gamitan usab kini og solar power, LED lights, ug rainwater catchment system aron makatabang sa pagpanalipod sa kalikupan.
Gilauman nga 2 hangtod 3 ka bulan ang pagtukod sa matag building, gamit ang wood plastic composite (WPC) nga materyales nga lig-on ug dali itukod.
Dugang pa, magpatukod ang probinsya og 269 ka Temporary Learning Shelters sa 34 ka lungsod aron dayon makagamit ang mga estudyante nga naapektuhan sa linog. Ang mga eskwelahan nga makabenepisyo gipili sa DepEd Cebu Province base sa ilang assessment.
Gilauman nga sulod sa usa ka bulan mahuman ang pagtukod aron andam na sa pag-abli sa klase sa Hunyo.
Sumala sa DepEd, 570 ka classrooms ang hingpit nga naguba, 1,101 ang grabeng nadaot, ug 1,723 ang minor ang kadaot tungod sa linog.
Matud ni Gov. Baricuatro, ang maong proyekto nagpakita sa tin-aw nga paningkamot sa Kapitolyo nga mabalik ang luwas, lig-on, ug modernong palibot sa pagkat-on alang sa liboan ka estudyanteng Sugboanon nga naapektuhan sa kalamidad.
Source: Cebu Province PIO
I via Renante Socia Lada