Usa ka mag-uuma gikan sa Barangay Libaong, San Remigio, Cebu ang nagpamatuod nga epektibo ang Agrilink, ang online nga plataporma sa Cebu Provincial Government nga nagdugtong diretso sa mga mag-uuma ug mananagat ngadto sa mga institutional buyers.
Si Nancy Bersales bag-o lang nakahatod sa iyang mga produkto sa usa ka pribadong kliyente nga iyang nakaila pinaagi sa Agrilink. Matud niya, dako kaayo ang tabang sa programa kay diretso na siya makabaligya ug dili na magsalig sa mga middleman.
Miingon si Bersales nga isip mag-uuma gikan sa usa ka wala kaayo nailhan nga lugar sa agrikultura, wala siya magdahom nga makatabang og ingon ani ang probinsyal nga gobyerno sa ilang mga produkto.
Matud pa niya, kaniadto lisod kaayo ang pagpamaligya kay wala siyay dagkong mamalitay, dugay ang balik sa puhunan, ug dali ra madaot ang mga produkto sa uma.
Ang Agrilink gihimo sa Information and Communications Technology Office (ICTO) sa Kapitolyo. Pinaagi niini, makapost ang mga mag-uuma ug mananagat sa ilang mga produkto, samtang ang mga buyer makapahibalo sa ilang panginahanglan. Tungod niini, diretso na ang sabot tali sa duha ka partido ug mas dako ang kita sa mga mag-uuma.
Atol sa paglusad sa Agrilink sa Dakbayan sa Naga niadtong Enero 27, miingon si Gobernador Pamela Baricuatro nga mas tutukan sa probinsyal nga gobyerno ang agrikultura ug panagat aron masulbad ang kagutom ug masiguro ang igong pagkaon sa lalawigan.
Matud sa Gobernador, ang agrikultura mao gihapon ang tin-aw nga solusyon batok sa kapobrehon.
Source: Cebu Province PIO
I via Renante Socia Lada