Hisgotan ni Mayor Raymond Alvin Garcia ang isyu sa mga barrier sa Cebu Bus Rapid Transit (CBRT) atol sa iyang umaabot nga pakigtagbo ni Engr. Norvin Imbong, project manager sa CBRT. Ang maong mga separator o babag sa Osmeña Blvd. gituohang nakaingon sa pipila ka mga aksidente sa motorsiklo.
Sumala sa mayor, nipahibawo kaniya ang CBRT sa miaging semana nga magbutang kini og mga barrier sa maong dalan. Gipasabot niya nga iyang giingnan ang CBRT nga butangan og tarong nga paskin ug pasidaan aron ang publiko, ilabi na ang mga motorista, masayod ug malikayan ang disgrasya.
“I told them nga make sure lang if that happens, can you put up the necessary signs and warn the public? Apparently, tingali wala pa man tingali na mabuhat karon,” segon ni Mayor Garcia.
Gipadayag sa mayor nga sa pagkompleto sa operasyon sa CBRT, ang maong mga separator magamit na sa husto. Apan sa pagkakaron, iyang susihon kung kinahanglan pa ba kini pabilin, temporaryong tangtangon, o ibutang lang daan aron maanad ang mga motorista.
Nagpabilin ang Cebu City Government nga mabinantayon sa epekto sa CBRT infrastructure sa kadalanan ug sa seguridad sa tanang motorista.
Source: Cebu City PIO
I via Renante Socia Lada