Nag-awhag si Mayor Nestor Archival sa tanan mga Sugboanon nga motabang sa pag-ila sa mga problema sa nagkalain-laing infrastructure projects sa siyudad pinaagi sa pagsumite og mga report ug hulagway. Kini nga panawagan kabahin sa paningkamot sa City Government nga masuta ug ma-verify ang kahimtang sa mga proyekto nga gi-finance sa Department of Public Works and Highways (DPWH) ug sa Department of Engineering and Public Works (DEPW).
Subay sa anunsiyo, giingon nga ang mga proyekto sa kalsada, drainage system, ug uban pang imprastruktura kinahanglan nga masusi ug ma-monitor, ilabi na ang mga nadaot, naay baha o stagnant water, bag-ong giukab, o dugay na nga wala matapos nga mga proyekto. Giingon usab nga ang mga sumbong sa katawhan mahimong basehan sa aksyon sa siyudad aron masiguro nga makompleto ang mga kontraktor sa ilang trabaho sa husto nga oras.
Gihangyo ni Mayor Archival nga ang mga report ipasa sa iyang opisyal nga Facebook page o sa Cebu City Public Information Office page. Kinahanglan nga apil sa report ang eksaktong lokasyon, klarong mga hulagway gikan sa lain-laing anggulo, ug uban pang detalyeng makatabang sama sa dugay na ba kini nga problema.
Matod sa mayor, pinaagi sa kooperasyon sa publiko, dali nilang matubag ang mga reklamo ug masiguro nga dili madaot ang serbisyo sa katawhan tungod sa mga atrasado o bati nga proyekto. Ang pagpakabana sa mga residente maoy usa ka dakong tabang aron mahimong mas epektibo ang ilang pagmonitor sa tanang dapit sa syudad.
Giawhag sa Cebu City Government ang tanan nga mga Sugboanon nga magpakabana ug mosumbong sa ilang mga obserbasyon aron matabangan ang siyudad nga mapaayo pa ang kalidad sa mga imprastruktura ug serbisyo para sa tanan.
I via Renante Socia Lada