Gitugotan ni Cebu City Mayor Nestor Archival ang mga sidewalk vendors nga magpadayon sa ilang negosyo basta magpabilin silang organisado ug dili makababag sa agianan sa mga tawo.
Kini gisulti sa mayor human sa iyang inspeksyon sa dapit sa North Bus Terminal ug Kaohsiung Street kagahapon Abril 16, 2026. Gisusi usab niya ang kahimtang sa mga vendors sa B. Rodriguez Street aron masiguro nga parehas ang pagsunod sa mga lagda.
Sumala kang Mayor Archival, okay ra sa siyudad nga manginabuhi ang mga vendors basta ibutang nila ang ilang baligya sa lugar nga dili makasamok sa mga naglakaw sa sidewalk. Daghan na sa mga vendors ang nisunod sa gitakdang linya, apan adunay pipila nga kinahanglan pa mag-adjust.
Sa iyang paglibot, nakit-an usab sa mayor ang pipila ka peligro sa dalan sama sa mga konkretong babag nga makapadagma sa mga tawo. Gimando niya nga tangtangon kini aron masiguro ang kaluwasan sa publiko.
Gimandoan usab ni Mayor Archival ang pagbutang og streetlights sa atubangan sa APM Mall aron masulbad ang kakulang sa suga, ilabi na sa gabii, alang sa kaluwasan sa mga commuters ug vendors.
Nagpasalamat usab ang mga vendors sa mayor tungod sa paghatag kanila og higayon nga magpadayon sa ilang panginabuhi, ug misaad nga magpabilin silang limpyo ug organisado samtang dili makababag sa agianan sa publiko.
Source: Cebu City PIO
I via Renante Socia Lada