Temporaryo nga sirhan ang Manipis Road sugod Pebrero 5, 2026, gikan alas-6 sa gabii hangtod alas-6 sa buntag, hangtod pa sa sunod nga pahibalo. Kini tungod sa General Threat Advisory nga gipagawas sa Mines and Geosciences Bureau Region 7 (MGB-7).
Sumala sa MGB-7 nga ubos sa pagpangulo ni OIC Regional Director Al Emil Berador, delikado ang kahimtang sa Manipis Road human sa ilang survey ug inspection, tungod sa posibilidad sa landslide ug rockfall, ilabi na karong adunay hulga sa Bagyong Basyang ug tungod sa nanglabay nga mga katalagman niining tuiga.
Ang opisyal nga suwat sa MGB-7 gipadala kang Mayor Samsam Gullas niadtong Pebrero 2, ug nadawat sa City Hall kaganihang buntag. Tumong sa advisory ang pagpanalipod sa mga residente ug motorista ug aron malikayan ang posibleng disgrasya nga makadaot sa kinabuhi.
Tungod niini, ang CT-TODA nagdesisyon nga sirhan una ang dalan sa oras sa gabii hangtod sa buntag, ilabi na sa umaabot nga pag-abot sa bagyo karong semanaha.
Gipahigayon usab ang emergency meeting nga gitambungan sa mga representante sa Barangay Lagtang, Jaclupan, Kampo 4 ug Manipis, kauban ang CT-TODA, CDRRMO, CSWD, City Administrator ug Mayor’s Office, aron planuhon ang maayong pagpatuman sa road closure.
Giawhag ang mga motorista ug mga trabahante nga moagi sa maong lugar nga magplano daan sa ilang biyahe ug motuman sa pahimangno sa otoridad alang sa kaluwasan sa tanan.
Source: CT-TODA
I via Renante Socia Lada