Pigpaposog kan lokal na gobyerno kan syudad nin Naga, Helen Keller International, asin Church of Jesus Christ of Latter-day Saints sa paagi nin sarong memorandum of agreement an pagbosol kan Barangay First 1,000 Days (BF1KD) Phase 3 na nagmamawot pangatamanan an salud kan mga ina asin saindang mga omboy sa paagi nin marhay na nutrisyon.
Sa piggibong project launch kasoodma, Febrero 3, 2026, pigpasalamatan ni Mayor Leni Robredo an duwang partner-organizations huli kan saindang pagdamay sa syudad tanganing magin mas makusog pa an kampanya para sa health asin nutrisyon sa 27 na barangay kan Naga.
Pigpahayag pa kan alkalde na mahihigos an mga health workers kan syudad kabali na an mga Barangay Health Workers na talagang nakatutok sa pag-implementar kan mga health programs kan Naga.
Sinabi kan alkalde na kaipuhan nanggad kan syudad an siring na partnership tanganing magin katuwang sa pagiging outcomes-oriented, bu-ot sabihon nakakamtan an marhay na resulta asin dae sana naka-focus an gibo sa mga aktibidad asin mga proseso.
Pigtawan du-on kaini na saro sa mga paagi tanganing ma-translate sa mas marhay na resulta an kahigosan asin pagiging passionate kan mga health workers iyo an marikas na pagkolekta nin tamang datos hali sa mga barangay na iyo an pagbabasehan sa pagdeterminar kun anong magkakanigong aksyon an kaipuhan gibohon tanganing matawan nin tamang nutrisyon asin marhay na salud an mga kaakian sa primero pa sanang 1,000 days kan saindang buhay.
Segun ki Robredo, an pagiging data-driven dalan pasiring sa pagkakaigwa nin marhay na nutrisyon asin salud, sarong liyabe tanganing makamtan an βbetter education outcomes o improved results of learning na maheheling man sa performance kan mga aki sa eskwelahan. I via Jason Neola
Source: Naga City Government