Padayon ang pagpangita sa usa ka 44-anyos nga mananagat nga gi-anod sa kusog nga baha sa Sitio Bateria, Barangay Poblacion, Guihulngan City sa gabii sa Hulyo 13, 2026.
Sumala sa kapulisan, mitabang ang mangingisda uban sa duha niya ka kauban sa pagluwas sa ilang mga pump boat tungod sa paspas nga pagsaka sa tubig sa suba. Bisan og gipasidan-an nga delikado na ang kahimtang, mipadayon gihapon siya sa pagtabang.
Sa dihang naglihok sila, nadasmag siya sa kusog nga sulog ug gi-anod padulong sa dagat.
Pagkahibalo sa insidente, daling mitabang ang Guihulngan City Police ug ang CDRRMO sa pagpangita sa mangingisda.
Sa pagkakaron, wala pa gihapon siya makit-i ug nagpadayon ang search operation uban sa tabang sa mga responder ug sa iyang pamilya.
Nagpahimangno ang kapulisan sa publiko nga mag-amping panahon sa kusog nga ulan ug baha. Likayan ang pagduol o pagtabok sa baha ug sundon ang mga pahimangno sa lokal nga awtoridad aron malikayan ang aksidente.
I via Renante Socia Lada and Roy Ortega