Di mominos sa P500 milyones nga kantidad sa mga pekeng luho ang nasakmit sa mga operatiba sa National Bureau of Investigation (NBI) gikan sa Manila atol sa pagpangronda sa usa ka mall sa dakbayan sa Mandaue niadtong Huwebes, Oktubre 17.
Gironda sa mga ahente sa NBI Intellectual Property Rights Division sa Manila, pinangulohan ni Supervising Agent John Ignacio, ang 33 ka stalls sa Park Mall sa Barangay Tipolo, Mandaue City gamit ang search warrant nga giisyu ni Judge Maria Victoria Villadolid sa Regional Trial Court (RTC) Branch 24 sa Manila tungod sa paglapas sa Intellectual Property Code of the Philippines.
Ang operasyon naggumikan sa reklamo sa Louis Vuitton sa Hongkong batok sa mga tindahan nga namaligya og peke nga LV products sa Mandaue City. Ang duha ka adlaw nga surveillance operation, nga naglakip sa test buy, gihimo niadtong Septiyembre aron pagkumpirma sa taho.
Matod ni Ignacio, ang mga peke nga LV bags gibaligya sa presyo gikan sa P2,500 ngadto sa P20,000 depende sa disenyo ug kalidad.
“Syempre yung peke na LV bag merong P2,500, may P5,000 or even P20,000. Pero ang original nga LV bag mokabat sa P100,000 ngadto sa usa ka milyon,” matod ni Ignacio.
Matod niya ang mga tag-iya sa 33 ka stalls pasakaan og kaso tungod sa paglapas sa intellectual property rights ubos sa Intellectual Property Code of the Philippines ug uban pang mga balaod.
Usa sa mga tag-iya sa stall nga wala magpaila niingon nga nasurpresa sila sa dihang gisultihan sila sa mga ahente sa NBI bahin sa raid kagahapon.
“Daghan sila og mga bag nga nakuha. Apil na mga sandals, relo, sunglasses, ariyos,” matod sa usa ka tag-iya sa tindahan nga naghilak. (Renante Lada)
(Source: NBI)