Nagpabiling malinawon ug hapsay ang pagsaulog sa Semana Santa sa Central Visayas, sumala sa Police Regional Office 7 (PRO7), nga nagreport og zero major incidents ug dakong pagkunhod sa krimen ug mga insidente sa trapiko.
Sa datos sa PRO7, ang total crime incidents mikunhod gikan sa 689 ka kaso niadtong 2025 ngadto sa 611 ka kaso karong 2026, o ubos og 11.32 porsyento katumbas sa 78 ka mas gamay nga insidente sa monitoring period gikan Marso 29 hangtod Abril 5, 2026.
Ang Index Crimes o ang gitawag nga 8 “focus crimes” mikunhod usab pag-ayo gikan sa 49 ngadto sa 33 ka insidente, o 32.65 porsyento nga pagkunhod. Naglakip kini sa murder, homicide, physical injury, rape, robbery, theft, ug carnapping sa sakyanan ug motorsiklo, mga krimen nga giisip nga batakang sukdanan sa kahimtang sa peace and order sa komunidad.
Samtang, ang Public Safety Indicators nga naglangkob sa mga insidente sa trapiko ug uban pang kahimtang sa dalan, miubos pag-ayo gikan sa 312 ka kaso niadtong 2025 ngadto sa 123 ka kaso karong 2026, o 60.58 porsyento nga pagkunhod. Nagpasabot kini nga mas luwas ang kadalanan bisan pa sa kadaghan sa mga biyahero ug deboto atol sa Semana Santa.
Apan, misaka ang Non-Index Crimes gikan sa 328 ngadto sa 455 ka kaso, o 38.72 porsyento nga pagtaas. Matod sa kapulisan, kini tungod sa ilang gipakusgan nga operasyon batok sa ilegal nga drogas, illegal gambling, ug uban pang paglapas sa espesyal nga mga balaod.
Matod ni PBGEN. Redrico A. Maranan, Regional Director sa PRO7, ang pagkunhod sa krimen nagpakita sa dedikasyon ug hugot nga paningkamot sa kapulisan, kauban ang ubang ahensya, lokal nga panggamhanan, ug ang publiko.
Dugang pa niya, nagpabiling alerto ug aktibo ang kapulisan sa pagseguro sa kaluwasan sa mga simbahan, terminal, tourist spots, ug uban pang lugar nga tapokan sa mga tawo atol sa Semana Santa.
Gipasalig usab sa PRO7 nga magpadayon sila sa pagpalig-on sa ilang mga estratehiya ug koordinasyon aron mapadayon ang kalinaw ug kahapsay sa tibuok Central Visayas.
Source: PRO7 PIO
I via Renante Socia Lada