Gipasidunggan sa Police Regional Office 7 (PRO7) ang pipila ka mga pulis tungod sa ilang talagsaong kontribusyon sa malampusong operasyon sa rehiyon atol sa flag raising ceremony sa Camp Sergio Osmeña Sr. kagahapon Abril 6, 2026.
Gihatagan og Medalya ng Kadakilaan sila PCAPT Venstine Bontilao ug PCPL Rey Almencion sa Police Station 9, Cebu City Police Office, human sa ilang malampusong pagdakop sa usa ka high-value target ug pagkumpiskar og kapin usa ka kilo nga shabu nga nagkantidad og ₱7.5 milyon sa Barangay Kalunasan, Cebu City.
Samtang, Medalya ng Kagalingan usab ang gihatag kang PLTCOL Ruel Burlat, PCPL John Kennedy Pajantoy ug PCPL Crisanto Arreglo sa Balamban Municipal Police Station tungod sa ilang epektibong pagpatuman sa search warrant nga misangpot sa pagkarekober sa .45 kalibre nga pusil ug granada sa Barangay Luca, Balamban, Cebu.
Gipasidunggan usab si PCPT Crisanto Arreglo ug PMSG Jaypee Baritua sa Aloguinsan MPS human sa ilang pagdakop sa usa ka Top 2 Most Wanted Person sa rehiyon nga gipasanginlan og murder ug paglapas sa balaod sa armas sa Barangay Rosario, Aloguinsan.
Dugang pa, nakadawat usab og maong award sila PLT Wenceslao Salimbangon ug PCPL Jonas Lequigan sa Danao City Police Station tungod sa pagdakop sa usa ka suspek nga nalambigit sa ilegal nga paghimo og armas sa Barangay Mantija, Danao City.
Sumala kang PBGEN. Redrico A. Maranan, Regional Director sa PRO7, ang mga nahimong kalampusan sa mga awardees nagpakita sa ilang propesyonalismo, pagkaalerto ug dedikasyon sa pagpatuman sa balaod, samtang nagpalig-on usab kini sa pagsalig sa publiko ug nagpadayag nga ang ilegal nga mga kalihokan dili gyud pasagdan sa kapulisan.
Source: PRO7 PIO
I via Renante Socia Lada