Nabugtuan sa kinabuhi ang usa ka mag-uuma human kini gipusil sulod sa iyang gipuy-an nga payag didto sa bukirang barangay sa lungsod sa Dalaguete pasado alas 11 sa gabii bisperas sa Pasko, Disyembre 25, 2024.
Ang biktima mao si Loudeseso Sanoy Amaba, 43-anyos, ulitawo apan adunay kapuyo ug molupyo sa maong dapit. Nigawas imbestigasyon sa Dalaguete Police Station, nga gisulod ang biktima sa gipuy-an niini dayon gipusil sa wala natino nga suspetsado na maoy hinungdan sa kamatayon niini. Pag-abot sa mga awtoridad sa lugar, ila nga nakita ang biktima nga walay kinabuhi ug adunay daghang samad pinusilan sa nagkadaiyang parti sa lawas.
Sa pagkakaron, padayon pang gipalawman ang imbestigasyon aron masuta ang motibo sa krimen ug si kinsa ang nihimo niini. Naghangyo usab ang kapulisan sa mga residente nga motabang sa imbestigasyon pinaagi sa paghatag og impormasyon nga makapadali sa pag-ila ug pagdakop sa suspetsado. (Renante Socia Lada)