Nabalhig sa orisuhan ang usa ka tanod sa Barangay Basak, Lapu-Lapu City, human kini gikatahong nagpabuto og armas atol sa pagsugat sa Pasko, Disyembre 25, 2024.
Ang suspetsado giila nga si Joseph Villanueva, 43-anyos, ug residente sa maong barangay.
Base sa imbestigasyon sa kapulisan, nakadawat sila og reklamo gikan sa mga residente sa maong lugar bahin sa sunod-sunod nga buto nga ilang nadungog human sa alas-12 sa tungang gabii.
Sa pagresponde sa Lapu-Lapu City Police, nadakpan si Villanueva ug nakuha gikan kaniya ang usa ka caliber .38 revolver ug usa ka Derringer pistol nga adunay buhing bala. Wala siya makatugyan og lisensya alang sa maong mga armas.
Matud ni Police Major Edgardo Zapanta, hepe sa Lapu-Lapu City Police Station 3, gisusi na karon ang background sa mga armas aron mahibal-an kung rehistrado kini o iligal.
Pasakaan si Villanueva og kaso nga Illegal Possession of Firearms and Ammunition ug Alarms and Scandals. Ang kapulisan nagpasidaan usab nga higpit nilang ipatuman ang balaod alang sa mga iligal nga pagbuto sa armas labi na sa panahon sa selebrasyon. (Renante Socia Lada)