Nakakuha og atensiyon sa kapulisan ang taho nga adunay 8-anyos nga batang babaye ang nabiktima sa pagpanglugos sa Toledo City, Cebu, nga gihimo sa upat ka menor-de-edad nga nag-edad og 9, 11, 12, ug 15 anyos.
Ang maong insidente nahitabo sa usa ka sapa nga layo sa ilang balay. Sumala sa inahan sa biktima, gidala sa mga ig-agaw ang iyang anak kauban ang usa ka bag-ong silingan nga 12-anyos. Ang 12-anyos maoy nisugo sa uban nga lugoson ang biktima, samtang ang 9-anyos nga ig-agaw maoy unang nagduwa sa kinatawo sa bata.
Human sa insidente, ang 9-anyos nga ig-agaw mibati og kakonsensya ug misumbong sa igsuon sa biktima, nga dayon gisultihan ang inahan. Ang inahan midangop sa kapulisan sa Toledo City.
Apan, tungod kay menor-de-edad ang mga suspetsado, wala sila mapasakaan og kaso ug giturn-over sila sa Department of Social Welfare and Development (DSWD). Sa imbestigasyon, mitug-an ang mga bata nga gisundog ra nila ang ilang nakita sa pornographic websites sa internet.
Ang maong insidente nagpahinumdom sa peligro kung pasagdaan ang kabataan nga magpatuyang og tan-aw sa internet labi na sa mga malaw-ay nga hulagway o video. (Renante Socia Lada)