Naligo sa kaugalingong dugo ang usa ka 33-anyos nga traysikel drayber human gipusil sa makadaghang higayon sa wala matino nga suspetsado.
Didto kini nahitabo sa Sitio Tigib, Barangay Lagtang, Talisay City, kagahapon sa hapon, Pebrero 1, 2025.
Ang biktima giila sa Talisay City Police Station na mao si Jeffrey Delantar, alyas “Pari,” residente sa Purok Tubig, Sitio Ilang-Ilang sa maong barangay.
Matud sa mga testigo, pasado alas-1 sa hapon sa Pebrero 1, 2025, kalit nilang nadunggan ang lima ka buto sa armas nga nakapakurat kanila.
Nasayran usab nga riding in tandem ang niduol sa biktima ug sa walay daghang storya nipusil kini na maoy hinungdan sa iyang kamatayon.
Sa pagkakaron nagpadayon ang imbestigasyon sa kapulisan sa Talisay City Police Station aron matino ang motibo sa krimen ug matumbok ang responsable niini. (Renante Socia Lada)