Patay ang usa ka 61-anyos nga apohan human maligsan sa usa ka multicab samtang naningkamot sa pagluwas sa iyang apo nga kalit nilabang sa karsada, niadtong miaging gabii sa lungsod sa Catmon, Cebu.
Ang biktima giila nga si Leoniza Aringgay Horzia, residente sa lugar. Sumala sa mga otoridad, nahitabo ang insidente dihang nakabantay siya nga milabang ang iyang apo sa dalan.
Sa inisyal nga imbestigasyon, giingong gigukod sa biktima ang bata aron malikayan unta ang posibleng disgrasya. Apan sa wala damha, siya maoy naigo sa multicab nga miagi sa maong dapit.
Ang sakyanan gimaneho sa usa ka 27-anyos nga lalaki nga taga Danao City, nga padulong unta sa dakbayan sa Bogo aron maghatod sa mga paninda sa dihang nahitabo ang aksidente.
Sa pagkakaron, gipadayon pa sa kapulisan ang imbestigasyon aron matino ang tukmang hinungdan sa hitabo, samtang ang drayber anaa na sa ilang kustodiya.
I via Renante Socia Lada