Patay ang usa ka dalagang college student samtang kritikal ang iyang kauban human mabanggaan sa usa ka ambulansya ang ilang gisakyan nga motorsiklo sa Archbishop Reyes flyover sa Barangay Luz, Martes sa hapon, Abril 14, 2026.
Ang namatay giila nga si Braille Nichole Kwek, 17 anyos, lumad sa Poro, Camotes ug estudyante sa kursong Mechanical Engineering. Siya ang backrider sa motorsiklo nga gimaneho sa iyang classmate nga si Juan Antonio Ladioray, 18 anyos, nga karon nagpadayon sa pagpakigbisog sa ospital tungod sa grabeng injuries.
Base sa pasiunang imbestigasyon sa Traffic Enforcement Unit (TEU), giingong ni-counterflow ang ambulansya ug nasudlan ang lane sa motorsiklo, hinungdan sa kusog nga bangga samtang padulong sa ilang eskwelahan sa Talamban ang duha ka estudyante.
Gibutyag usab nga nagdala og pasyenteng giatake sa stroke ang ambulansya maong paspas ang dagan niini. Tungod sa kusog sa impact, nangalagpot ang duha ka biktima gikan sa motorsiklo.
Ang dalagang estudyante namatay dayon sa hitabo, samtang ang driver sa motorsiklo gidala sa pribadong ospital alang sa tambal.
Sa pagkakaron, padayong gitanggong sa Mabolo Police Station ang driver sa ambulansya alang sa dugang imbestigasyon.
I via Renante Socia Lada