Naningkamot karon ang probinsyal nga gobyerno sa Cebu nga iparehas o i-standardize ang oras sa truck ban sa tanang lungsod ug siyudad sa Metro Cebu aron mapaspas ang paglihok sa mga kargamento, mapagaan ang trapiko, ug makatabang sa pagpugong sa pagsaka sa presyo sa mga palaliton.
Sumala ni Gobernador Pamela Baricuatro, ang pagbaton og usa ka parehas nga schedule sa truck ban makatabang sa pagsulbad sa mga problema sa logistics sector nga naapektuhan usab sa mga krisis sa gawas sa nasud, lakip na sa Middle East, nga nakaapekto sa gasto sa transportasyon ug presyo sa mga produkto.
Gihisgutan kini atol sa tigum kagahapon Abril 14 uban sa mga traffic managers gikan sa 14 ka lokal nga gobyerno sa Metro Cebu, gikan sa Danao City hangtod sa Carcar City, apil na ang Cebu City, Mandaue City ug Lapu-Lapu City. Didto gipasiugda ang panginahanglan nga magkausa ang mga polisiya aron malikayan ang kalibog sa dalan.
Matod pa sa gobernador, usa sa mga problema karon mao nga lain-laing oras ang truck ban sa matag LGU. Tungod niini, usahay makalusot ang mga trak sa usa ka lugar apan mapugngan sa kasikbit nga lungsod, hinungdan nga mohunong lang sila sa daplin sa dalan ug makadugang sa trapiko.
Gisuportahan usab sa Department of Trade and Industry sa Central Visayas ang maong lakang ug nagkanayon nga ang paghiusa sa mga regulasyon sa logistics makatabang sa pagpaubos sa presyo sa mga palaliton. Sa karon, ipadayag pa sa mga traffic managers ang maong sugyot ngadto sa ilang mga mayor alang sa posibleng pag-apruba ug implementasyon.
Source: Cebu Capitol PIO
I via Renante Socia Lada