Nagpasalamat ang pamilya ni Fema Sagang, 37-anyos nga inahan gikan sa Dumanjug, sa suporta nga gihatag ni Gov. Pamela Baricuatro alang sa malampusong liver transplant sa iyang anak nga hapit na magtulo ka tuig ang edad sa India niadtong Nobyembre.
Ang pamilya ni Sagang nangayo og tabang sa gobernador niadtong Setyembre ug nadawat ang pinansyal nga suporta alang sa operasyon sa bata. Sa usa ka emosyonal nga panagtigom kagahapon, gihagkan ni Gov. Baricuatro ang bata nga klarong maayo na ang kahimtang sa panglawas ug abtik na.
Sa usa ka pakighinabi sa telepono, ang amahan sa bata nga si Ramilo Perez mipaabot sa iyang dakong pasalamat sa gobernador tungod sa importante nga pinansyal nga tabang alang sa operasyon sa iyang anak.
Miingon si Perez, “Dako gyud kaayo among pasalamat ni Gov. Pamela Baricuatro sa tabang nga iyang nahatag namo. Dali ra kaayo mi nahatagan.” Gidugang niya nga mas sayon na karon ang pagpangayo og tabang sa Kapitolyo tungod kay si Gov. Pam na ang gobernador.
Giklaro usab ni Perez nga kadaghanan sa gasto sa operasyon sa India natabunan sa duha ka foundations, usa gikan sa Germany ug usa gikan sa United States, samtang ang tabang gikan sa Kapitolyo nakatabang aron ma-cover ang uban pang gasto sa pamilya.
Source: Cebu Province PIO
I via Renante Socia Lada