Nasikop sa operasyon batok sa iligal nga drogas ang usa ka job order employee sa lungsod sa San Francisco, Cebu, kauban ang iyang live-in partner, atol sa buy-bust operation nga gihimo sa PDEA Cebu ug sa kapulisan, didto sa Barangay Santa Cruz, San Francisco, Cebu, niadtong Oktubre 12, 2025.
Ang Barangay Santa Cruz giila na nga usa ka “drug-cleared” area, apan padayon gihapon ang operasyon sa mga otoridad aron mapugngan ang pagbalik sa kalihokan sa iligal nga drogas. Ang mga sakop sa PDEA ug PNP mipahigayon sa maong operasyon human makadawat og impormasyon kabahin sa pagpamaligya sa ginadiling droga sa maong lugar.
Sumala sa balaod, ang pagpamaligya og iligal nga drogas adunay silot nga tibuok kinabuhi nga pagkabilanggo ug multa nga gikan ₱500,000 hangtod ₱1 milyon.
Padayon ang PDEA Cebu sa pagpalig-on sa mga operasyon ilabi na sa mga drug-cleared barangay, aron masiguro nga magpabilin kini nga gawas sa iligal nga kalihokan ug aron dali matubag ang mga bag-ong kaso sa paggamit o pagpamaligya og drogas.
Source: PDEA-7
I via Renante Socia Lada