Wala nay kinabuhi nga niabot sa tambalanan ang biktima nga nangayog kamonggay human gibunalan sa iyang silingan.
Ang maong krimin nahitabo pasado alas 10:30 sa gabii, Nobembre 7,2022, didto sa Sitio Akhro, Barangay Cantabaco, Dakbayan sa Toledo.
Giila ang biktima sa Toledo Police Station nga si Eduardo Ombao Villarmea, 40 anyos ang panuigon, mag-uuma, ulitawo, residenti rapud sa maong lugar.
Naila usab ang suspetsado nga si Belino Sasan Villar, 54 anyos ang pangidaron, Ulitawo, nagpuyo rapud sa maong lugar.
Segon ni PSSgt Joselito Genon ang inbestigador sa maong kaso nga mga pasado alas 12 sa tungang gabii gi deklarar sa Doktor nga wala nay kinabuhi ang biktima sa tambalan.
Sa gihimo nga pakisusi nasayran nga niadtong higayuna nangayog kamonggay si Villarmea ni Villar aron iyang i sud-an apan gibunalan kini og kahoy nga naigo sa agtang na maoy hinungdan sa iyang hinalaling kamatayon.
Dugang ni Genon nga asoy sa suspetsado nga kaupat na siya gisulong sa biktima tungod sa ilang kanhi panagbangi nga wala siya kapugong sa iyang kaugalingon og iya kining napatay.
Hinuon sa pag respondi sa kapulisan ila rang nasikop ang mamumuno.
Ipasaka karong alas 10:00 sa buntag ang kasong murder batok sa suspetsado. (Renante Lada, photo courtesy of Toledo Police Station)