Usa ka ordinaryong residente sa Barangay Jubay ang nahimong tinud-anay nga bayani sa kalit nga pagbaha sa Liloan, human niya naluwas ang 12 ka tawo—lakip ang usa ka 8-month-old nga bata—bisan pa nga nag-antos siya og sakit ug walay pormal nga rescue training.
Ang 19-anyos nga si Joshua Sandal, nga sa una giila sa komunidad nga “badboy,” miusbaw ug nahimong simbolo sa paglaum ug kaisog human sa iyang kusganong pagtabang sa panahon sa kalamidad. Gawas sa iyang pagluwas sa mga buhi, nakabangal pa siya og 4 ka patay’ng lawas nga gianod sa baha, aron mahatagan og hustong pag-atiman ug pag-ila.
Ang iyang gihimong pagserbisyo nakit-an sa video nga mi-viral sa social media. Kini maoy nakapahimo kang Barangay Mabolo Captain Atty. Daniel Arguedo nga personal siyang ipatawag ug pasidunggan tungod sa iyang extraordinayong kaisog.
Sumala ni Kap. Arguedo, “Ang mga tawo nga sama niya kinahanglan gyud pasidunggan. Nisugal siya sa iyang kinabuhi para sa uban, bisan og walay training. Mao ni ang tinuod nga espiritu sa pagkabayanihan.”
Gawas sa pasidungog, gihatagan si Joshua ug full scholarship ubos sa Mabolo Scholarship Program aron makapadayon sa iyang pag-eskwela. Gihimo kini aron masuportahan ang iyang pangandoy nga makahuman og pagtungha ug makabag-o sa iyang kaugmaon.
Dugang pa, gihatagan siya og trabaho ni Kap. Arguedo isip usa ka miyembro sa Mabolo Smart Responders, aron mas mapaayo pa ang iyang abilidad sa pagtabang sa komunidad ug mahatagan siya og mas lig-on nga pundasyon sa iyang bag-ong dalan sa kinabuhi.
Sa kasamtangan, giila si Joshua nga inspirasyon sa iyang silingan—usa ka ehemplo nga bisan ang tawo nga giisip kaniadto nga problema, mahimong mahimong bayani kung ihatag ang kasingkasing sa pagtabang.
📸 Ting Joe Pepito
I via Renante Socia Lada