Usa ka 61-anyos nga lalaki nga PWD (person with disability) ang nakit-ang wala na’y kinabuhi sa sapa sa Sityo Pailob, Barangay Sambag 2, Dakbayan sa Sugbo sayo sa buntag kagahapon, Hunyo 12, 2025. Ang biktima giila nga si Wilfredo Sacay, mas nailhan sa ilang lugar sa alyas nga “Blue Eyes” tungod sa kolor sa iyang mga mata.
Sumala sa kasayuran sa mga silingan, nakita pa si Sacay nga naglingkod kilid sa agianan mga alas 4 sa kadlawon. Apan pagkahuman sa pipila ka oras, nadungog na lang nila ang balita nga kini siya namatay ug nakit-an na lang nga buy-od sa ubos sa sapa. Gituohan sa mga residente nga posibleng nahulog kini gikan sa taas nga bahin sa daplin sa sapa, nga gibana-banang tulo ka metro ang kahabogon.
Si Sacay giingong naglisod na og panlantaw tungod sa katarata, ug usa usab siya ka amang. Sumala pa sa mga silingan, kaniadto nakaluwas siya sa duha ka insidente sa disgrasya, napusilan ug naligsan, apan karon, wala na siya nakalingkawas sa kapalaran.
Ang mga sakop sa Special Rescue Force sa Bureau of Fire Protection maoy miresponde sa lugar ug maoy mi-ugkat sa lawas ni Sacay gikan sa ubos. Gi-request pa sa iyang igsoon nga dad-on kini sa ospital, apan gideklarar na kining dead-on-arrival pag-abot sa tambalanan.
📸 CTTO
I via Renante Socia Lada