Wala maka ipsot sa gihimong joint buy-bust operation sa mga personahe sa kapulisan ang 2 ka high-value drug suspect ug nakumpiska ang 50 ka gramo sa gituohang shabu nga mobalor sa P340,000.00 , didto sa Purok Bayanihan, Barangay Sta. Filomena, dakbayan sa Dipolog, mga alas 6:41 ang takna sa kagabhion,Hunyo 10,2025.
Naila ang mga dinakpan nga nagpangidaron ug usa ka 54 anyos, ulitawo, walay trabaho, ug residente sa Purok Bayanihan, Barangay Sta. Filomena; ug usa ka 57 anyos, residente sa Green Village, Barangay Sta. Filomena, pareho sa dakbayan sa Dipolog.
Ang operasyon gihimo sa mga personahe sa SOU9, PNP Drug Enforcement Group (PNP-DEG) isip lead unit, sa koordinasyon sa Dipolog City Police Station, Zamboanga del Norte Provincial Intelligence Team-RIU9, PDEA-ZDN, ug PDEU-ZDN.
Atol sa operasyon, nakuha sa mga otoridad ang usa ka dako nga heat-sealed transparent plastic pack ug usa ka gamay nga sachet nga adunay sulod nga white crystalline substance nga gituohang shabu.
Nasakmit usab ang usa ka red Berlin cigarette box, nga nagsilbi nga drug container, lakip ang usa ka tinuod nga P1,000 bill nga gibutang sa ibabaw sa PHP64,000 nga boodle money, ug usa ka puti nga Redmi Android cellphone.
Ang mga nakumpiska nga ebidensiya anaa na sa kustodiya sa SOU9 alang sa tukmang dokumentasyon, samtang ang mga dinakpan anaa sa temporaryo nga protective custody sa Dipolog City Police Station samtang nagpaabot sa dugang imbestigasyon ug disposisyon.(Medalyn U. Borja)
Source: ZNPPO