Nakabsan gyud sa kinabuhi ang usa ka lalaki nga nagpasugal human gipusil sa wala maila nga mamumuno.
Nahitabo ang pagpamusil pasado alas 7:00 kagabii, Disyembre 30, 2022, didto sa Sityo Villa Devina, Barangay Sambag, Lungsod sa Liloan, Probinsya sa Sugbo.
Ang biktima giila sa Liloan Police Station nga mao si Larry Buot Enriquez, hingkod ang panuigon, nagpuyo sa Barangay Tuburan Sur, Siyudad sa Danao.
Si PSSGT. Arne Guc-ong ang imbestigador sa maong kaso nihimo gyud dayon sa pasiunang imbestigasyon sa maong pagpamusil patay sud sa sugalan.
Sa nasayran nga si Enriquez maoy nibangka sa sugal nga hantak atol sa kapistahan sa maong lugar.
Kalit kining giduol sa nakabonnet nga lalaki dayon gipusil nga maoy hinungdan sa kamatayon niini.
Daling nisibat ang nagpusil dala ang bag sa biktima diin didto gisulod ang kwarta.
Dugang imbestigasyon ang gihimo karon sa kapulisan sa Liloan aron pagtino sa motibo sa maong krimin. (Renante Lada)