Usa ka lalaki ang namatay human gipusil sa iyang silingan nga mag-uuma sa Sitio Toong, Brgy. Cantuba, Buenavista, Bohol, alas 8:55 sa buntag, Agosto 18, 2025.
Ang biktima giila nga si Jomarie, 42 anyos, minyo ug lumad sa maong lugar. Ang suspetsado mao ang iyang silingan nga giila nga si Graciano, usa ka mag-uuma nga hamtong na ang edad, nga karon padayon pang gipangita sa kapulisan.
Base sa inisyal nga imbestigasyon sa Buenavista Municipal Police Station, nahibaw-an nga si Jomarie misulong ngadto sa balay sa suspetsado samtang nagdala og sundang ug nanghagít og pinatyanay. Didto naglalis ang duha hangtod nga si Graciano, nga armado og wala pa matino nga kalibre sa pusil, mipusil sa biktima makapila ka beses sa ulo ug lawas niini.
Pag-abot sa mga kapulisan nga sila PEMS Dante Del Rosario Jr. ug PCpl Christian Ali Estorgio, ilang nadiskobrehan ang biktima nga naghigda na sa barangay road ug wala nay panimuot.
Ang mga sakop sa MDRRMO Buenavista Emergency Response Team dayon mitabang ug midala sa biktima padulong sa Francisco Dagohoy Hospital sa Inabanga, apan gideklarar kini nga dead on arrival sa doktor.
Samtang ang suspetsado dali usab misibat pagkahuman sa insidente. Gipahigayon na karon ang hot pursuit operation aron madakpan ang responsable sa pagpamusil.
Ang kapulisan nagpahinumdom sa publiko nga likayan ang away ug personal nga panagbangi aron malikayan ang ingon nga mga insidente nga mosangpot sa grabeng kadaut ug pagkawala sa kinabuhi.
I via Renante Socia Lada