Gihatagan og Letter of Appreciation ni Consul General Song Sewon sa Korean Consulate sa Cebu si Police Brigadier General Redrico A. Maranan, Regional Director sa Police Regional Office 7 (PRO7), human sa malampusong pagdakop ug pagsilbi og Interpol Red Notices batok sa lima ka Koreano nga wanted sa ilang nasud. Ang seremonya gihimo niadtong Agosto 18, 2025.
Gipasiugda ni Consul General Song nga kini nga pag-ila mao’y timaan sa bililhong kooperasyon tali sa Republic of Korea Consulate sa Cebu ug PRO7, ug usa ka pamatuod sa dedikasyon sa kapulisan sa rehiyon sa pagtuman sa balaod ug internasyonal nga koordinasyon.
Alas-2:10 sa hapon, gipangunahan ni PLTCOL Wilfredo T. Taran Jr. sa Regional Special Operations Unit (RSOU7) ang operasyon uban sa tabang sa Regional Intelligence Division 7 (RID7) nga gipangulohan ni PCOL Russel Maca, kauban usab ang mga representante sa Bureau of Immigration, Korean Consulate, ug Korean Police. Ang lima ka Koreano gihatud ngadto sa RPDEU7 Custodial Facility diin pormal nga gisilbi ang Red Notices.
Ang mga langyaw kasamtangan nga gipangita sa ilang nasud tungod sa paglapas sa Articles 47(2) ug 26(1) sa National Sports Promotion Act sa Republic of Korea. Ang operasyon milungtad sa malinawon ug tarong nga paagi, ug gisaksihan mismo sa mga opisyal sa Korea ug sa Bureau of Immigration.
Sa pagkakaron, nagpabilin sa kustodiya sa PRO7 ang lima ka Korean nationals samtang naghulat sa tukmang proseso ug mga direktiba gikan sa Hall of Justice sa Cebu City ug sa Bureau of Immigration.
Source: PRO7
I via Renante Socia Lada