Padayon pa ang imbestigasyon sa kapulisan human nakit-an ang lawas sa usa ka lalaki nga naglutaw sa dagat duol sa Pasil Fish Port sa Dakbayan sa Sugbo sa Pebrero 16, 2026.
Giila ang biktima nga si “RJ Saavedra Vega,” 39 anyos, residente sa Barangay Calamba. Sumala sa imbestigasyon sa Sawang Calero Police Station, nadawat nila ang report sa maong insidente ug dali silang miresponde kauban ang rescue team aron makuha ang lawas.
Base sa pamahayag sa saksi, niambak kuno sa dagat ang biktima niadtong Pebrero 15 human gibadlong sa tag-iya sa bangka nga iyang gisakyan.
Giingon nga kabalo kini molangoy apan nakit-an nga naglisod hangtod sa mitidlom ug wala na makita.
Pagkahuman sa halos 24 oras nga pagpangita, ang lawas nakit-an sa mga roving guard sa Cebu-Cordova Link Expressway nga maoy mipahibalo dayon sa Coast Guard ug sa kapulisan.
Gisusi karon sa mga otoridad kung aksidente ba ang hitabo o adunay laing anggulo nga angay tutokan sa imbestigasyon.
📸 CTTO
I via Renante Socia Lada