Matod sa Cebu City PIO nga gisulti ni Mayor Raymond Alvin Garcia atol sa 4th Quarter Regional Peace and Order Council (RPOC) Meeting karong adlawa, Disyembre 12, 2024, nga andam magpalit og incinerating machine ang Kagamhanan sa Dakbayan sa Sugbo alang sa Philippine Drug Enforcement Agency (PDEA)-7.
KIni human nahisgutan atol sa maong tigom, nga gipahigayon sa NUStar Resort & Casino sa South Road Properties, ang suliran sa drugas, ilabi na dinhi sa dakbayan sa Sugbo.
Gani, gitug-an sa PDEA-7 nga nisaka karon ang gidaghanon sa supply sa drugas sa Tungatungang Kabisay-an bisan pa sa walay hunong nila nga operasyon kauban ang Philippine National Police (PNP).
Nahisgotan sab sa tigom ang nasugatang problema sa PDEA sa pagsunog sa mga druga nga nasakmit nga may pagtugot na sa hukmanan nga mahimo nang idispatsar, kay lagi mag-agad pa sila sa usa ka puneraryo kung kanus-a mabakante ang ilang incinerator.
Ang tubag ni Mayor Garcia mao nga andam ang dakbayan sa Sugbo nga maoy mogahin og P5 milyones aron sayo na nga masunog sa PDEA-7 ang drugas nga nahuman na nagamit isip ebidensiya.
“Kung naa tay kaugalingon (nga incinerator) kita mag-control. Mas maayo gyud na because anytime, at our pleasur,e pwede nato masunog or ma-destroy…ang mga illegal drugs. So, maaayo na niingon ko nga willing ang City of Cebu nga mogahin og budget para pagpalit ana nga incinerator o makina para ma atoa na,” ingon niya.
Nidugang ang mayor nga kung anaa na ang incinerating machine itugyan kin ngadto sa PDEA-7 aron kini na maoy moatiman niini o ba kaha idonar nalang kung wala silay pundo aron dili na mag-agad og mga pribadong kompaniya alang sa pagsunog sa mga ilegal nga druga.
Kahinumdoman nga nagsunog ang PDEA-7 og 71 ka kilos kapin nga ilegal nga drugas, hain 42 niini gikan sa dakbayan sa Sugbo, nga may pagtugot sa hukmanan nga gun-obon na.
Niingon siya nga samtang iyang nakita ang grabeng paningkamit sa kapulisan ug sa PDEA-7, nakadawat gihapon siya og taho nga sayon kuno gihapon kaayo ang pagpalit og ilegal nga drugas, kahimtang nga angay niyang hisgotan sa laing tigom kauban ang PDEA ug ang Philippine National Police.
“Problema man gud aning highly-urbanized cities mao gyud ni, pangdunggoanan sa druga, kay daghan ang population as compared to naa kas munisipyo or naa kas probinsya nga wa kaayo. Naa sila dinhi…sa highly-urbanized cities,” ingon ni Mayor Garcia.
“And all the more ang mga local government units kinahanglan aware og careful kaayo ta ana ug iistrikto gyud nato ang implementation sa atong mga balaod,” dugang niya. (Renante Socia Lada)
(Source: Cebu City PIO)