Usa ka 27 anyos nga motorista ang namatay sa sayong buntag sa Disyembre 28, 2025 human maaksidente sa kurbadahong bahin sa National Highway sa Barangay Media Once, Toledo City.
Ang biktima giila nga si Fretz Anthony Barino Sombreno, residente sa Barangay Tangke, Talisay City, nga nagmaneho sa Yamaha Aerox nga motorsiklo.
Sumala sa Toledo City Police Station, nagbiyahe ang biktima gikan sa Lapu-Lapu City padulong Ginatilan. Pag-abot sa kurbada sa maong lugar alas 5:45 sa buntag, nawad-an kini og kontrol sa motorsiklo, natumba, ug nalabay padulong sa kasukwahi nga linya sa dalan.
Didto, naligid ug nalatayan sa usa ka bulk truck nga nagbiyahe sa opposite direction ang biktima. Ang truck gimaneho ni Art Jason Restauro Jimenez, residente sa Barangay Bunga, Toledo City.
Miresponde dayon ang mga kapulisan ug rescue team ug gidala ang biktima sa Toledo City Hospital, apan gideklarar nga dead on arrival sa mga doktor.
Giklasipikar sa kapulisan ang insidente isip Reckless Imprudence Resulting to Death, ug padayon ang imbestigasyon aron matino kon kondisyon sa dalan, tulin sa sakyanan, o visibility sa buntag ang nakaamot sa trahedya.
Gidasig ang mga motorista sa kapulisan, ilabi na sa sayong buntag ug sa mga kurbadahon, nga mag-amping sa pagdrayb ug likayan ang paspas nga tulin aron malikayan ang susamang disgrasya.
Source: Toledo City Police Station
I via Renante Socia Lada