Patay ang usa ka amahan human gipusil sa riding in tandeem, pasado alas 5:00 sa hapon. Enero 24, 2025, sa Dakbayan sa Carcar.
Giila sa Carcar City Police Station ang biktima nga si Randy Camacho Suico, 41 anyos, residente sa Danao 2, Barangay Valencia, Carcar City.
Base sa imbestigasyon, si Suico nagmaneho sa iyang motorsiklo padulong sa eskwelahan sa iyang anak. Apan samtang nagbiyahe, gisundan siya sa duha ka lalaki nga sakay sa motorsiklo. Pag-abot sa usa ka dapit, gipusil dayon siya sa mga suspek gamit ang 45 caliber nga armas.
Si Suico nakaangkon og daghang samad pinusilan ug gisuwayan pag dala sa Cebu Provincial Hospital-Carcar, apan gideklarar siyang dead on arrival.
Ang mga suspek daling misibat gamit ang ilang motorsiklo ug wala pa maila. Narekober sa lugar ang unom ka kabhang sa bala nga kalibre .45.
Matod ni Police Staff Sergeant Francisco Saberon sa Carcar City Police, nagpadayon ang ilang imbestigasyon aron mahibal-an ang motibo sa krimen ug maila ang mga suspek. (Renante Socia Lada)