Tungod sa kalisod ug walay trabaho naaghat kining usa ka lalaki sa pagkawat sa halad sa simbahan sa Compostela, Cebu kagahapong adlawa, Nobiyembre 15, 2024.
Naa karon sa Compostela Police Station nagtingkagol ang suspetsado nga naila sa pangalan nga Michael Morales Arcenal 26-anyos lumulopyo sa Barangay Poblacion, sa nahisgutang lungsod.
Si Msgr. Ildebrando Leyson ang kuraparuko sa Archdiocesan Shrine of Santiago Apostol de Compostela daling nakapangayo ug tabang sa kapulisan hinungdan nga nasikop ang kawatan.
Base sa imbestigasyon sa kapulisan, misulod ang suspek pinaagi sa pagguba sa grill door ug nikuha kini sa kwarta nga adunay kantidad nga Php 1,797.00 gikan sa kahon sa koleksyon. Ang kantidad gibutang sa usa ka pula nga panapton nga na-rekober usab gikan sa suspek.
Si Arcenal miangkon sa sala nga iyang nabuhat ug matod pa niya nga iya lamang nabuhat ang pagpangawat gumikan nga wala na siyay kwarta ug wala pa usab siya makakita ug trabaho.
Gitataw sa kawatan nga sa wala pa siya nangawat nag-ampo pa kini sa Ginoo nga mangawat siya sa halad sa simbahan. (Renante Socia Lada)