Ang Police Regional Office 7 nagpahigayon og mga pagpangandam alang sa seguridad ug kaluwasan sa 11th Meeting sa Council of ASEAN Chief Justices ug sa ASEAN Law Association meeting.
Usa ka pormal nga send-off ceremony ang gipahigayon sa Mactan Shrine sa dakbayan sa Lapu-Lapu niadtong Biyernes, Nobiyembre 15,2024 sa pakigtambayayong sa mga partner nga ahensya sa gobyerno.
Ang seremonyas gipangunahan ni Police Brigadier General Anthony Aberin, ang Regional Director, PRO-7, ug gitambungan sa nagkalain-laing law enforcement agencies nga mosuporta sa kapulisan sa pagpatuman sa komprehensibong security measures.
Kini nga lakang gitumong sa pagsiguro sa hapsay ug luwas nga pagpahigayon niining importante nga internasyonal nga kalihokan alang sa tanang mga delegado ug mga partisipante.
Mokabat sa 781 ka mga PNP personnel, uban sa 821 ka mga kauban gikan sa Bureau of Fire Protection, Philippine Coast Guard, Regional Maritime Unit, City Disaster Risk Reduction and Management Office (CDRRMO), City Traffic Management System (CTMS) sa Lapu-Lapu City, ug Task Force Kasaligan, maoy responsable sa pagsiguro sa kalihokan. Kini nga mga kawani magpadayon sa usa ka mabinantayon nga presensya 24/7 gikan sa Nobyembre 18 hangtod 21, 2024.
Ang 11th Meeting sa Council of ASEAN Chief Justices (CACJ), nga kaniadto nailhan nga ASEAN Chief Justices Meeting, natukod niadtong Agosto 23, 2013, isip plataporma sa mga Chief Justice sa paghisgot ug pagsulbad sa komon nga mga isyu nga giatubang sa mga hurisdiksiyon sa ASEAN.
Ang maong panagtapok nagpunting sa panaghiusa ug panagsinabtanany sa usag-usa sa mga miyembro nga estado. Moapil niini nga kalihokan mao ang mga representante gikan sa napulo ka mga nasud sa ASEAN ug tulo ka dugang nga mga nasud, lakip ang 13 ka Chief Justice, 24 ka mga Justices, 27 ka mga VIP, ug gibanabana nga 100 ka mga delegado sa ALA, nga mahitabo gikan sa Nobyembre 18 ngadto sa 21, 2024, sa Shangri-La Mactan, Sugbo.
Sa iyang mga pakigpulong, si Police Brigadier General Aberin nagpahayag sa pagpaabut nga makab-ot ang usa ka “zero nga insidente” nga rekord atol niini nga miting.
“I expect a “zero incident” record throughout the meeting. Let us do our part to exemplify Philippine hospitality and security, thereby demonstrating to the ASEAN community and the international audience the nation’s competence, reliability, and commitment to the success of the event,”segon ni Police Brigadier General Aberin. (Renante Socia Lada)
(Source: PRO-7 PIO)