Sa ulahing datos nga gipagawas sa Cebu City Health Department (CCHD), pinaagi ni Dr. Daisy Villa gibutyag nga nisaka ang kaso sa dengue ug Covid-19 sa siyudad sa Sugbo.
Apan gitataw niini nga dili pa kini angay kabalak-an bisan paman sa pagsaka sa kaso karong tuiga kumpara sa niaging tuig.
Gibutyag ni Dr. Villa nga nagsugod pagsaka ang mga kaso sa Covid dinhi sa dakbayan sa Sugbo sa buwan sa Mayo hangtod na karong Hunyo.
Matod pa ni Dr. Villa nga 10, 204 ka mga lumolupyo dinhi sa dakbayan nga nagpakita ug mga ilhanan sa Covid karong tuiga, adunay 539 nga nagpositibo, o positivity rate nga 5 porsiyento.
Samtang 133 ang konpirmadong natakbuyan sa dengue karong tuiga, diin adunay nakalas nga usa ka tres anyos nga bata nga taga-Brgy. Buhisan.
“Sa dengue, sige gihapon ta’g adto sa atong mga kabaranggayan ilabi na kadtong naay affected nga mga kaso. Sayo gyud kaayo moadto ang atong dengue team ug kuhaon ang possible nga mga breeding sites. As far as we are concerned, we are really doing what is needed to be done specially on the attack sa atong mga kaso,” matod ni Dr. Villa.
“It is very important that we will continue the hygiene, continue atong buhaton nga maghugas sa kamot…kay dili gyud ta masaag kung kaning tanan atong buhaton,” dugang niya. (Renante Socia Lada)
(Source: Cebu City PIO)