Gipailalom sa random drug test ang mga kawani sa Cebu Police Provincial Office (CPPO) kagahapon Hunyo 2, 2026 isip kabahin sa ilang kampanya aron masiguro nga limpyo sa ilegal nga drogas ang ilang han-ay.
Ang kalihokan gipangulohan sa Cebu PPO ubos sa liderato ni Police Colonel Abubakar Udang Mangelen Jr., ug gipahigayon sa tabang sa Regional Forensic Unit 7 (RFU7).
Sumala sa CPPO, ang random drug test kabahin sa gipalig-on nga programa sa Philippine National Police (PNP) batok sa ilegal nga drogas sulod mismo sa organisasyon. Tumong niini nga masiguro nga ang tanang pulis disiplinado, responsable, ug andam sa pagtuman sa ilang katungdanan sa pagpanalipod sa komunidad.
Gipasiugda usab ni PCOL Mangelen nga importante nga ang mga pulis magpakita og integridad ug maayong pamatasan dili lamang sa ilang trabaho kondili usab sa ilang personal nga kinabuhi. Matud pa niya, mas mosalig ang publiko sa kapulisan kung makita nga sila mismo nagtuman sa balaod.
Pinaagi sa maong kalihokan, padayon nga gipalig-on sa Cebu PPO ang kultura sa disiplina, transparency, ug propesyonalismo aron masiguro nga ang matag pulis mahimong kasaligan sa pagserbisyo ug pagpanalipod sa katawhan.
I via Renante Socia Lada