Hapit 1,000 ka security personnel ang ipakatap sa Lapu-Lapu City aron masiguro ang kaluwasan sa umaabot nga Asean Tourism Forum sunod semana. Ang lakang naglakip sa kapulisan, traffic personnel, fire protection, ug disaster management teams aron mapadayon ang kahapsay ug seguridad sa siyudad.
Sumala ni Police Col. Antonietto Cañete, officer-in-charge sa LCPO, daghang importanteng personalidad ang motambong sa forum. Gihatagan og dakong pagtagad ang seguridad gikan sa ilang pag-abot sa Mactan-Cebu International Airport hangtod sa ilang pagbiya pabalik sa tagsa-tagsa nila ka nasud.
Bisan pa sa dako nga kalihokan, gipasabot ni Cañete nga igo na ang kapulisan nga na-assign, ug wala pa nangayo og dugang tabang. Sigurado siya nga andam ang mga personnel sa pag-atubang sa bisan unsang kahimtang.
Dugang pa, 40 ka personnel gikan sa City Traffic Management System, 36 ka personnel sa Bureau of Fire Protection, ug 68 ka personnel gikan sa City Disaster Risk Reduction and Management Office ang motabang aron masiguro ang kahapsay sa trapiko ug kaluwasan sa forum.
Ang forum magsugod sa welcome dinner sa Enero 28 sa Mactan Shrine sa Barangay Mactan, Lapu-Lapu City. Gisiguro sa LCPO nga kung makita nilang kinahanglan pa og dugang pwersa, mangayo sila og tabang gikan sa Police Regional Office sa Central Visayas.
I via Renante Socia Lada