Gipalig-on sa Gobiyerno sa Lalawigan sa Cebu ang ilang kampanya batok sa leptospirosis atol sa bag-ong pagbaha ug padayon nga pag-ulan pinaagi sa pag apod-apod og 445,874 prophylactic capsules sa 27 ka lokal nga kagamhanan sukad sa Nobyembre 4.
Ang leptospirosis usa ka seryosong bacterial infection nga kasagarang makuha pinaagi sa kontak sa tubig baha nga kontaminado sa ihi sa hayop, ug labi nga peligroso sa mga residente nga nag-labang sa baha o naglimpyo pagkahuman sa pagbaha.
Ang pinakabag-ong batch sa distribusyon gi-apod-apod sa upat ka LGUs nga bag-ohay lang naapektuhan sa baha — Carcar City, Balamban, Dumanjug, ug Barili — nga nakadawat og total nga 99,000 capsules, uban sa Dumanjug nga 30,000, Barili 43,000, Carcar 26,000, ug Balamban 5,000 capsules.
Gipadali sa Provincial Health Team ang paghatag sa tambal human sa hangyo sa mga lokal nga opisyal nga nagreport og mas taas nga exposure risks sa ilang komunidad. Gipasiugda ni Gov. Pamela Baricuatro nga ang prevention mao gihapon ang lig-on nga depensa sa Cebu, diin ang prophylaxis gihatag sa mga tawo nga taas o balik-balik ang kontak sa tubig baha, lakip ang mga trabahante, commuters, ug pamilya nga naapektuhan sa baha.
Gipahimangnoan usab niya ang publiko nga ang tambal usa lamang ka matang sa proteksyon; gikinahanglan gihapon nga malikayan ang tubig baha, magsul-ob og protective gear, ug magpakonsulta dayon sa doktor kung adunay sintomas sama sa hilanat, kasakit sa kalawasan, o itom nga ihi.
Nagpadayon ang Capitol sa pakigtambayayong sa mga LGUs aron magmonitor sa kaso, maghatag og dugang nga suplay kung kinahanglan, ug palig-onon ang information campaigns, nga nagpamatuod sa dedikasyon sa lalawigan sa proactive ug community-centered public health measures alang sa high-risk nga residente sa Cebu.
Source: Cebu Province PIO
I via Renante Socia Lada