Giaprobahan sa Cebu Provincial Board sa ikatulo ug katapusang pagbasa ang usa ka ordinansa nga nagtukod sa Persons with Disability Affairs Division (PDAD) sa Capitol, usa ka opisina nga nagtutok sa pagpalambo sa katungod ug kaayohan sa mga Persons with Disabilities (PWDs) sa tibuok lalawigan.
Gisulat ni Third District Board Member Dason Lorenz Lagon, chair sa Committee on Differently Abled Persons, ang ordinansa nga nagtinguha sa pagpanalipod sa dignidad ug kaayohan sa mga PWDs, pagsiguro sa ilang hingpit nga partisipasyon ug patas nga oportunidad sa komunidad, ug pagtukod og lig-on nga institusyonal nga estruktura alang sa implementasyon sa mga balaod bahin sa disability.
Ang balaod usab nagsiguro sa igo nga pondo, kawani, pasilidad, ug oversight alang sa mga programa para sa PWDs, nga naka-align sa panan-aw ni Gov. Pamela Baricuatro sa inclusivity ug sa iyang paningkamot nga “walay Sugboanon PWD nga mabyaan.”
Ubos sa ordinansa, ang PDAD mag-operate ubos sa supervision ug control sa Office of the Governor, kauban ang koordinasyon sa chairperson sa Provincial Board’s Committee on Differently Abled Persons.
Ang mga gimbuhaton sa PDAD naglakip sa paghimo ug pagpatuman sa mga polisiya ug programa para sa PWDs, pagrepresentar sa sektor sa development councils, pakigtambayayong sa NGOs ug people’s organizations, pagmintinar sa provincial PWD database, ug paghatag og impormasyon bahin sa mga serbisyo ug oportunidad.
Obligado usab ang PDAD sa pagsumite og regular nga report ngadto sa gobernador ug komitiba, pag-advocate sa pondo para sa mga programa, pag-monitor sa fundraising, ug pagpangita og donasyon sumala sa aprubadong work plans.
Pinaagi sa pag-aprubar sa ordinansa, ang Lalawigan sa Cebu nakakab-ot og dako nga lakang padulong sa lig-on nga institusyonal nga mekanismo para sa disability inclusion ug pagsiguro nga ang mga PWDs makadawat og kompleto nga suporta gikan sa provincial government.
Source: Cebu Province PIO
I via Renante Socia Lada