Dako ang kalampusan nga nakuha sa Central Visayas gahapon samtang si Gobernadora Pam Baricuatro, Chairperson sa Regional Development Council (RDC) sa Rehiyon 7, malampusong napalambo ang prayoridad nga development agenda sa rehiyon atol sa Regional–National Investment Programming (RNIP) Dialogue Sessions sa PICC.
Ang tibuok adlaw nga kalihokan nagtigum sa tanan nga RDC Chairs sa tibuok nasud, kauban ang mga importante nga Cabinet secretaries, undersecretaries, assistant secretaries, ug mga heads sa planning agencies—nga nahimong pinakaepektibo nga venue sa pagtino kung unsang regional proposals ang iapil sa Philippine Investment Plan (PIP), National Expenditure Program (NEP), ug sa General Appropriations Act (GAA).
Human sa biyahe gikan sa mga lugar nga naapektuhan sa bagyo sa habagatang bahin sa Cebu, miapil si Gob. Baricuatro sa tibuok adlaw nga kalihokan sa Manila nga naglakip sa RDC–ACO cluster dialogues ug Executive Dinner uban sa mga key cabinet secretaries.
Gipasiugda ni Gob. Pam sa sesyon ang panginahanglanon sa pag-ayo sa mga classroom ug housing aid alang sa mga naapektuhan sa bagyo ug kalamidad sa probinsya. Sa resulta, DepEd nagpahibalo nga magtugot og ₱1 bilyon para sa pag-ayo sa mga eskwelahan, samtang ang DHSUD mipakita og suporta sa ayuda para sa mga pamilya nga naapektuhan sa kalamidad.
Gisumite usab ni Gob. Baricuatro ang medium- ug long-term infrastructure ug resilience projects nga importante para sa Central Visayas, lakip na ang Metro Cebu Expressway, key dams para sa flood control ug water security, Talisay–Minglanilla–Naga Bypass Road, ug ang modernisasyon sa Bantayan ug Camotes hospitals.
Sa lig-on nga pagpakita sa regional unity, gi-representar usab sa gobernadora ang Bohol, diin gipangayo ang urgent consideration sa Tubigon District Jail, nga wala pa nalista sa approved projects. Gipahibalo sa national officials nga kinahanglan pa og dugang nga dokumento ug requirements aron ma-endorse ang proyekto.
Gipasalig sa DepDev 7, pinangulohan ni Regional Director Jennifer Bretaña, nga paspasan ug tumanon dayon isumite ang mga kinahanglanon aron mareconsider ang proyekto. Gidayeg sa mga opisyal ang cohesive approach sa Rehiyon 7, diin gisiguro ni Gob. Pam nga tanang probinsya sa rehiyon, dili lang Cebu maprotektahan ug masuportahan.
Gihulagway ni Gov. Pam ang adlaw nga kalihokan ingon usa ka dako nga kadaugan para sa Central Visayas, nga nagpakita nga ang mga panginahanglan sa rehiyon dili lang napaminaw, kundili maayong na-dokumento para sa aksyon sa nasudnon nga lebel. Ang RNIP outputs moagi pa og ACO validation alang sa posibleng pag-apil sa Agency Public Investment Programs, NEP, ug umaabot nga national budget cycles, samtang nag-andam ang rehiyon alang sa ASEAN 2026 ug long-term economic growth.
Source: Cebu Province PIO
I via Renante Socia Lada