Gipatuman sa Cebu Provincial Government ang hugot nga drug-free workplace policy, nga nagtugot sa random drug testing alang sa tanang opisyal ug empleyado sa Kapitolyo, bisan unsa pa nga ranggo, posisyon, o suweldo.
Kini human girmahan ni Governor Pamela Baricuatro ang Executive Order No. 2 niadtong Enero 12, 2026. Ang EO nagpatuman sa Provincial Ordinance No. 2025-10 o ang “Drug-Free Workplace Ordinance,” nga tumong masiguro ang luwas ug limpyo nga palibot sa trabaho.
Matod sa ordinansa, pwede magpahigayon og otorisado ug random drug testing sumala sa Republic Act 9165 o Comprehensive Dangerous Drugs Act. Ang testing buhaton sa DOH-accredited laboratories ug sekretong bantayan ang resulta.
Ang mga opisyal o empleyado nga makaplagan nga naggamit, nagbaton, namaligya, o nag-apod-apod og ilegal nga drogas, lakip na ang drug paraphernalia, mahimong tangtangon sa serbisyo ug kasuhan og kriminal. Ang dili mutugot sa drug test walay sakto nga rason, mahimong silotan og administratiba.
Obligado usab ang drug testing sa pipila ka kahimtangan sama sa pre-employment, promosyon, pagbalik sa trabaho human rehabilitasyon, o kon adunay drug-related nga reklamo.
Gipahimutang usab ang Drug-Free Workplace Committee nga pangunahan sa gobernador aron magbantay sa implementasyon sa polisiya, magdumala sa testing, ug motabang sa rehabilitation ug counseling sa mga apektadong empleyado.
Matod sa Kapitolyo, ang maong lakang nagpakita sa lig-on nga baruganan sa probinsya batok sa ilegal nga drogas ug nagpahinumdom nga ang tinuod nga serbisyo publiko nagkinahanglan og disiplina, integridad, ug kasaligan nga mga kawani.
Source: Cebu Province PIO
I via Renante Socia Lada Renante