Gipirmahan ni Cebu Governor Pamela Baricuatro ang Executive Order No. 74 nga nagmugna sa “Metro Cebu Flood Control and Drainage System Implementation Task Force,” nga maoy mahimong nag-unang lawas sa pagplano, paghiusa, ug pagpatuman sa mga proyekto alang sa pagpaayo sa drainage ug pagpakunhod sa baha sa Metro Cebu.
Si Gov. Baricuatro ang mangulo sa task force, samtang si Vice Governor Glenn Soco ang mopuli nga chairman. Apil sa miyembro ang Provincial Administrator nga si Atty. Ace Durano ug mga department head sa Capitol, ug ang mga mayor sa Metro Cebu LGUs: Carcar City, San Fernando, City of Naga, Minglanilla, Talisay City, Consolacion, Liloan, Compostela, Danao City, ingon man ang mga mayor sa Cebu City, Mandaue City, ug Lapu-Lapu City.
Apil usab ang mga regional director sa nagkalain-laing national agencies, uban sa mga representante sa USC Water Resource Center ug Movement for Livable Cebu.
Lakip sa mandato sa task force ang:
• Pagmugna sa implementation strategy sa Metro Cebu Integrated Flood Control and Drainage System Master Plan nga naglakip og hazard mapping, watershed management, engineering solutions, zoning policies, ug climate adaptation measures.
• Pagrekomendar sa mga prioridad nga flood mitigation projects alang sa Annual Investment Program, Provincial Development Plan, ug uban pang planning documents.
• Pakigtambayayong sa national agencies, LGUs, utility providers, ug private sector sa mga inisyatiba bahin sa drainage ug flood control.
• Pagbantay sa pag-implementar sa mga provincial flood mitigation projects ug pagsiguro nga mosubay kini sa national standards ug best practices.
• Pagpalambo og early warning ug monitoring systems lakip ang community-based forecasting ug flood monitoring mechanisms.
Ang direktiba ni Gov. Baricuatro misunod human sa bag-ong bagyo nga nagdala og grabe nga pagbaha sa probinsya, nagdaot og kabalayan, imprastruktura, umahan, ug panginabuhi, ug nakaapekto sa mga essential services.
Gipunting sa EO nga ang kahimtang nagkinahanglan og paspas ug tinagsa nga lihok aron maprotektahan ang kinabuhi ug kabtangan.
Gipasabot usab sa Provincial Government nga tungod sa nagkadako nga kusog sa mga bagyo ug uban pang climate-driven hazards, kinahanglan nga mosunod ang Metro Cebu og “holistic, integrated, ug sustainable flood mitigation measures” nga naghiusa sa paningkamot sa national agencies, LGUs, ug komunidad.
Source: Cebu Province PIO
I via Renante Socia Lada