Gipalig-on sa Commission on Elections (Comelec) ang pagka-eligible ni Cebu Governor Pamela Baricuatro human gidismiss ang disqualification case nga gisang-at batok niya, nga nag-akusar og paglapas sa Fair Election Act atol sa May 2025 elections.
Ang petisyon gisumite ni Katrina Kaye Kowalik, kanhi hepe sa Sugbo News, ang social media arm sa Capitol. Giakusahan niya si Gov. Baricuatro nga nakalapas sa Section 5 in relation to Section 3 sa Republic Act 9006 (Fair Election Act) ug sa Comelec Resolutions 11086 ug 11117, base sa usa ka social media post nga nag-angkon nga nag-una si Baricuatro sa gubernatorial race sa 82 porsyento.
Apan sa desisyon sa Comelec First Division, gihukman nga i-dismiss ang kaso tungod sa technicality. Matod sa division, napakyas ang petitioner sa pagpresentar sa proof of service sa petisyon—lakip ang kompleto nga annexes—ngadto sa respondent, o sa pag-submit ug affidavit of service nga nagpakita nga naserbisyohan gyud kini.
Tungod niini, gibarugan sa Comelec nga dili mahimong modayon ang kaso ug nagpabilin nga fully qualified si Governor Baricuatro sa iyang posisyon.
Source: COMELEC
I via Renante Socia Lada