Gihatagan sa Kapitolyo sa Sugbo og kapin ₱108.2 milyon nga tabang ang mga mag-uuma ug LGU sa isla sa Camotes. Gidala mismo nila Governor Gwen Garcia ug Vice Governor-elect Glenn Soco ang mga makinang panguma, kagamitan, ug puhunan para sa mga lungsod sa San Francisco, Poro, Tudela, ug Pilar.
Gipahigayon ang distribusyon sa San Francisco Gym isip suporta sa Sugbo Maisan program, nga nagtumong nga paspasan ang produksyon sa yellow corn, usa sa nag-unang dakong panginahanglan karon.
Tag-₱10 milyon nga seed capital ang gihatag sa matag lungsod isip sinugdanan. Nadawat kini sa mga mayor sa San Francisco, Poro, Tudela, ug Pilar. Gihatag pud ang ₱68 milyon nga kagamitang panguma sama sa traktora, corn harvesters, timbangan, ug corn dryers.
Gisuportahan ang proyekto sa mga ahensya sa gobyerno ug pribado sama sa DA-7, DOLE-7, Landbank, Coop Bank of Cebu, ug mga mamalitay nga San Miguel Foods ug Upland Stocks Food Inc. Ang tinguha: mas daghang mais, mas lig-on nga kita sa mga mag-uuma.
Nagpirma usab og kasabutan ang upat ka mayor para sa Inter-LGU Council aron sigurado nga magtinabangay ang tanang lungsod sa Camotes. Kapin 200 ka grupo sa mag-uuma ang nitambong sa kalihukan timaan nga andam sila musalmot sa kalambuan sa agrikultura.
Source: Cebu Provincial Capitol, PIO
I via Renante Socia Lada