Nagpagawas og mando si Cebu Governor Pamela Baricuatro sa pagsuspenso sa klase karong adlawa, Enero 19, 2026, alang sa tanang lebel sa public schools nga sakop sa probinsya, human sa dagkong kalihokan sa Sinulog Festival 2026.
Sumala sa gobernador, daghang estudyante ang miapil ug mitambong sa mga kalihokan sa Sinulog, hinungdan nga gikinahanglan nila og igo nga pahulay ug oras sa luwas nga pagbiyahe pauli.
Ang suspensyon sa klase naglangkob lamang sa mga eskwelahan nga ubos sa provincial jurisdiction, ug nagtinguha nga malikayan ang kakapoy ug posible nga risgo sa mga estudyante human sa pista.
Gihatagan usab og konsiderasyon ang mga empleyado sa Kapitolyo nga nag-duty atol sa Sinulog weekend, diin gitugotan sila og compensatory day off karon isip pasalamat sa ilang serbisyo.
Matod sa Kapitolyo, ang maong lakang kabahin sa paningkamot sa probinsya nga maampingong maatiman ang kaayohan sa mga estudyante ug empleyado, samtang gihatagan og bili ang kaluwasan ug kahimsog sa tanan human sa dakong selebrasyon.
Source: Cebu Province PIO
I via Renante Socia Lada