Aron masuportahan ang industriya sa mais sa amihanang bahin sa Sugbo, migahin og pundo ang Kapitolyo ngaiabot sa ₱10 milyon alang sa mga LGU sa Bogo City, San Remigio, ug Medellin.
Gigahin kini nga pondo ubos sa programa nga Sugbo Maisan, aron mapalit dayon sa LGU ang mga mais nga anihon sa mga rehistradong mag-uuma sa ilang lugar. Gitumong usab kini aron makatabangan sa mga mag-uuma nga molukso gikan sa industriya sa tubo nga nagkaluya na.
Gipahibalo kini ni Gob. Gwen Garcia atol sa miting sa Sugbo Maisan nga gipahigayon sa Bogo City Hall Complex. Apil sa mitambong mao sila Mayor Carlo Martinez (Bogo), Mayor Joven Mondigo Jr. (Medellin), ug Mayor-elect Mariano Martinez (San Remigio), uban sa Vice Governor-elect Glenn Anthony Soco ug Board Member Kerrie Shimura.
Gihatagan usab sa Kapitolyo ang tulo ka LGU og mga bag-ong gamit sa uma sama sa corn dryer, corn harvester, traktor, ug seeder planter aron mas dali ug moderno ang ilang pagpanguma.
Kapin 190 ka mga mag-uuma ang nitambong sa miting, 130 gikan sa Bogo, 50 sa San Remigio, ug 10 sa Medellin, nga aktibo sa Sugbo Maisan program.
Ang Sugbo Maisan usa ka programa sa Kapitolyo nga nagtumong sa pagpalambo sa kinitaan sa mag-uuma pinaagi sa suporta sa binhi, gamit sa uma, koneksyon sa mamalitay, ug pinansyal nga tabang.
Nagpasalamat ang mga mayor sa tulo ka LGU sa padayon nga suporta sa Kapitolyo alang sa sektor sa agrikultura sa ika-upat nga distrito.
Gisulti usab ni Gob. Garcia nga mohatag usab og parehas nga pondo para sa mga isla sa Camotes.
Source: Cebu Provincial Capitol, PIO
I via Renante Socia Lada